Máis información?

O Marco Galego de competencias dixitais establece 5 grandes áreas de dominio e 21 competencias. Podes velo nesta ligazón.

O Marco Galego de competencias dixitais, conforme ao Documento de Bases e ao Decreto 132/2021, serve como instrumento oficial para a normalización, avaliación e acreditación das competencias dixitais en Galicia. Os seus principais propósitos son:

Definir e homologar un catálogo de competencias dixitais con descritores e niveis que faciliten a valoración obxectiva do dominio dixital.

Servir de referencia para o deseño de programas formativos, itinerarios de aprendizaxe e currículo educativo en todos os niveis.

Construír o marco de referencia para procedementos de recoñecemento e acreditación, establecendo criterios e evidencias para a certificación.

O Marco Galego de competencias dixitais determina os coñecementos, habilidades e aptitudes necesarias para contribuír ao desenvolvemento dunha sociedade usuaria de servizos dixitais avanzados, mellora profesional e benestar colectivo.

Nace para dar resposta á necesidade de acadar unha cidadanía dixitalmente responsable nun contexto no que a relación coa Administración, a vida cotiá e o emprego requiren o uso continuado das tecnoloxías da sociedade da información, para o que se van desenvolver unha serie de áreas e competencias dixitais que permitirá ter de referencia.

Ten 4 niveis: iniciación, intermedio, avanzado e especializado. Os dous primeiros estanse a desenvolver actualmente e os dous superiores desenvolveranse no futuro.

Nivel iniciación, adquírense coñecementos e destrezas iniciais para acceder e utilizar as tecnoloxías dixitais con seguridade e responsabilidade.

Nivel intermedio, aplícanse as competencias dixitais con maior autonomía e extensión, adoptando criterios de avaliación e solucións máis complexas.

Activarase unha ferramenta de autodiagnose que che permitirá coñecer cal é o teu nivel. Esta proba estará dispoñible nesta web de competencias dixitais e, en función do resultado, recomendará itinerarios formativos que che permitan desenvolver as túas habilidades.

Na oferta formativa da EGAP para o persoal da Administración Pública existen dúas modalidades principais:

Autoformación: permite preparar os contidos de maneira autónoma, ao teu propio ritmo e sen acompañamento docente. Os materiais están dispoñibles na plataforma de teleformación da EGAP, onde se poden consultar os recursos de referencia para preparar a proba de libre acceso da certificación ComDix. 

Todo o material é gratuíto e está pensado para que cada persoa poida organizar a súa preparación sen necesidade de asistir a formación presencial.

Cursos con aproveitamento activo e avaliación continua: ofrece unha aprendizaxe guiada, con planificación, seguimento e apoio docente ao longo do proceso formativo. Esta modalidade está dispoñible na páxina web de Competencias Dixitais, na área relativa a formación, onde se publica a oferta dirixida ao persoal da Administración Pública. 

Nesta modalidade, o alumnado conta cunha estrutura de traballo definida, actividades e prazos establecidos, así como acompañamento por parte do persoal titor.

Autoformación
É a opción ideal para quen queira preparar pola súa conta a proba de certificación ComDix. A autoformación consiste en materiais dispoñibles en liña para que cada persoa poida aprender ao seu propio ritmo, sen horarios fixos e sen acompañamento titorizado.

Características principais:

• Acceso libre e gratuíto aos contidos.
• Recursos teóricos e prácticos organizados por niveis. 
• Non require inscrición nin seguimento por parte do persoal formador.
• Non inclúe avaliación continua nin acreditación directa.

Formación titorizada
A formación titorizada baseada nun itinerario de aprendizaxe guiado, no que a persoa participante conta con apoio e seguimento ao longo do proceso formativo.

Características principais:

• Seguimento personalizado do progreso da persoa participante.
• Actividades guiadas e avaliación continua.

É a opción máis axeitada para quen precise acompañamento, orientación e práctica supervisada.

Actualmente, a través da Rede CeMIT están dispoñibles os contidos formativos vinculados ao Marco Galego de competencias dixitais, (https://formacion-cemit.xunta.gal). Para acceder aos mesmos, é necesario rexistrarse previamente como persoa usuaria da Rede CeMIT.

Para a cidadanía existen dúas opcións, contidos de autoformación (nivel iniciación activo e nivel intermedio proximamente) e formación titorizada.

Para o persoal da Administración Pública existen dúas opcións a través da plataforma da EGAP (Lista de cursos :: EGAP), contidos de autoformación e cursos titorizados.

Os materiais oficiais para preparar a proba de libre acceso da certificación ComDix a través da EGAP están dispoñibles na súa plataforma de teleformación, onde atoparás os recursos necesarios para preparar a avaliación.
Todo o material é gratuíto e está pensado para que cada persoa poida preparar a proba de maneira autónoma, sen necesidade de asistir a formación presencial.

Os materiais para preparar a certificación ComDix están dispoñibles na área de formación da web de Competencias Dixitais. Na sección de autoformación atopará a ligazón da plataforma de teleformación da Rede CeMIT onde se inclúen:

• Contidos organizados por niveis (básico e intermedio), para que poidas estudar segundo o teu punto de partida.
• Materiais teóricos e prácticos que explican as competencias dixitais que se avalían na proba.
• Recursos interactivos que che permiten avanzar ao teu ritmo e reforzar o aprendido.

Todo o material é gratuíto e está pensado para que calquera persoa poida prepararse de forma autónoma, sen necesidade de asistir a formación presencial.

A Rede de centros para a modernización e inclusión tecnolóxica, Rede CeMIT, está habilitada e autorizada para realizar formación e avaliación para a certificación en competencias dixitais definida no Marco Galego de competencias dixitais. Actualmente, na súa plataforma de teleformación (https://formacion-cemit.xunta.gal), previa alta como persoa usuaria, pódense visibilizar contidos, relacionados coas competencias dixitais derivadas do Marco Galego de competencias dixitais e que permiten adquirir coñecementos, habilidades e aptitudes no eido dixital.

É importante ter en conta que en caso de superar estes cursos formativos en modalidade autoformación, obterase un diploma de aproveitamento polas horas formativas realizadas, pero non outorgan directamente a certificación ComDix, que deberá obterse polas vías dispoñibles no Documento de Bases para o desenvolvemento do Marco Galego de competencias dixitais.

Facendo referencia ao persoal da Administración Pública, existe a posibilidade dentro da EGAP (Lista de cursos :: EGAP) de acceder aos contidos de autoformación que permiten aprender por conta da usuaria ou usuario e ao seu propio ritmo. 

Estes contidos non emiten ningún tipo de certificado, e tampouco é necesario visualizalos na súa totalidade, preséntase como un material de apoio aos participantes para ter de referencia e preparar a proba ComDix.

Actualmente están dispoñibles a certificación ComDix iniciación e a certificación ComDix intermedio. Ambas inclúen as 21 competencias das 5 áreas, só varía o nivel de habilidade. Posteriormente desenvolveranse as certificacións dos niveis avanzado e especializado.

A certificación terá unha validez de 5 anos. As persoas acreditadas poderán renovar a súa certificación dende seis meses antes e ata os seis meses naturais posteriores á data de caducidade.

A participación nas probas de acceso libre está exenta de taxas, así como a participación en calquera dos cursos ofrecidos pola Xunta de Galicia que son de carácter gratuíto.

A certificación galega en competencias dixitais ComDix está dirixida a toda a cidadanía maior de 16 anos, sen importar a súa situación laboral ou formativa. 

É un documento dixital, en galego e castelán, asinado electronicamente, e cun código único que verificará a súa autenticidade. Incluirá información sobre a persoa titular da certificación, o seu nivel de aptitude nas diferentes áreas e competencias, a data e forma de obtención da mesma.

Estará accesible na sede electrónica da Xunta de Galicia, na carpeta do cidadán, mediante o acceso con certificado electrónico, DNIe, Chave365 ou usuario e contrasinal. 

Pasos a seguir:

• Accede á Sede Electrónica: sede.xunta.gal 

Para estar informada ou informado podes acceder a estes sitios web competenciasdixitais.xunta.gal e Inicio | CeMIT onde terás a información ampliada e actualizada sobre a nova acreditación e o proceso de homologación coa certificación CODIX, así como toda a información sobre a certificación e os plans de formación dispoñibles. Estas webs actualizaranse de maneira continuada para incluír toda a información que poida ser de interese para a cidadanía.

Para estar informada ou informado podes acceder a estes sitios web competenciasdixitais.xunta.gal e Portada :: EGAP onde terás a información ampliada e actualizada sobre a nova acreditación e o proceso de homologación coa certificación CODIX, así como toda a información sobre a certificación e os plans de formación dispoñibles. Estas webs actualizaranse de maneira continuada para incluír toda a información que poida ser de interese para o persoal da Administración Pública.

A certificación galega en competencias dixitais pode conseguirse a través de tres vías de obtención principais, segundo o establecido no Marco Galego de competencias dixitais: 

Superando unha proba de certificación de acceso libre:

As probas son convocadas pola EGAP e están dirixidas ao persoal da Administración Pública, mediante a publicación da convocatoria no DOG.

Superando un itinerario formativo completo con avaliación continua e aproveitamento activo:

Consiste en seguir un itinerario formativo completo, con varios cursos titorizados ata obter os coñecementos necesarios para acadar un dos niveis de certificación ComDix.

Superando o curso ponte de CODIX a ComDix Iniciación:

A superación da acción formativa, xunto coa verificación de dispoñer do certificado CODIX, implicará a obtención do ComDix Iniciación.

* Pendente de que se aprobe e publique a normativa correspondente.

Ao finalizar a proba e resultar apta ou apto, dispoñerás dun xustificante acreditativo ata a data da emisión do certificado ComDix.

Este xustificante ten validez e certifica o seu dominio en competencias dixitais.

A demo da plataforma ten un único obxectivo: Permitir que as persoas usuarias se familiaricen coa interface, co tipo de preguntas e coa dinámica xeral da proba de certificación en competencias dixitais. Non avalía, non garda resultados e non corrixe as respostas que se fallen. A súa función é exclusivamente coñecer o funcionamento da plataforma e reducir incertezas antes de realizar a proba oficial.

O propio modelo de certificado non alude a horas concretas, senón que se refire en detalle a cada unha das 21 competencias dixitais acreditadas.

Si obtén o certificado como consecuencia de completar un itinerario de cursos titorizados, si disporá dos correspondentes diplomas de aproveitamento que si cuantifican as horas de formación validadas.

As persoas que resultan aptas na proba reciben un correo electrónico informativo no enderezo facilitado durante o proceso. As persoas non aptas non reciben ningún correo, xa que os resultados só se comunican en caso de superar a certificación.

Se pasou un tempo razoable e non recibiches o correo de apto, é posible que houbese un erro no enderezo electrónico ou un problema na entrega. Nese caso, debes escribir a competencias-dixitais [at] xunta.gal (competencias-dixitais[at]xunta[dot]gal) enviando:

• Os teus datos persoais
• A data e hora da proba

Con esta información poderemos revisar a túa proba e enviar a resposta correspondente.

Para decidir se optas por un nivel ou outro, debes ter en conta tanto os teus coñecementos previos como as túas necesidades no ámbito dixital.

Se o teu nivel de coñecemento é básico e/ou utilizas tecnoloxías dixitais para realizar tarefas rutineiras, que podes lembrar, pero necesitarías orientación para outras máis específicas, debes escoller ComDix iniciación.

Se o teu nivel de coñecemento che permite explicar a outras persoas como realizar tarefas sinxelas e deseñar estratexias de uso adaptadas e/ou utilizas habitualmente tecnoloxías dixitais -no teu ámbito persoal e profesional-, debes escoller ComDix intermedio.

É necesario realizar a solicitude de inscrición dentro do prazo establecido e a través do formulario telemático habilitado pola EGAP. O proceso garante que todas as persoas participantes presenten a súa solicitude nas mesmas condicións.

1. Para participar na convocatoria, debes presentar a túa solicitude desde o día seguinte ao da publicación da resolución no Diario Oficial de Galicia (DOG). A inscrición só pode realizarse mediante o formulario de matrícula telemática dispoñible en https://egap.xunta.gal/matricula.
2. Só se permite presentar unha solicitude de inscrición por persoa participante. É importante cubrir correctamente todos os datos do formulario, xa que serán excluídas automaticamente as solicitudes que non se axusten ao modelo oficial, que conteñan datos incompletos ou incorrectos, ou que se cumplimenten fóra de prazo.
3. Unha vez rematado o proceso de inscrición, a EGAP publicará no enderezo https://egap.xunta.gal a relación das persoas admitidas, en reserva e excluídas para participar en cada proba de certificación, indicando en cada caso a localidade, o día e o horario de realización.

A solicitude de revisión dunha pregunta só pode realizarse nun único momento e por unha única vía oficial: xusto ao finalizar a proba, Despois de aparecer en pantalla o resultado obtido, pódense facer as observacións oportunas indicando as preguntas para a súa revisión.

Unha vez pulsado o botón “Finalizar”, xa non é posible engadir nin modificar solicitudes de revisión.

A renuncia dunha inscrición nunha proba de certificación ComDix debe realizarse de acordo co establecido na resolución da correspondente convocatoria de probas de libre acceso.
Tal e como recolle a normativa vixente, para formalizar a renuncia é necesario presentar unha xustificación válida, axustada aos supostos previstos na resolución.

As persoas inscritas que precisen cancelar a súa participación deberán ter en conta os prazos sinalados e enviar unha comunicación ao enderezo habilitado para a xestión do proceso, indicando:

• Os seus datos persoais
• A proba na que estaban inscritas
• A motivación da cancelación conforme aos criterios recollidos na resolución da convocatoria

Unha vez recibida a solicitude, o equipo responsable revisará a documentación achegada e comunicará a resolución correspondente.

Non haberá máis convocatorias de formación e probas para a acreditación CODIX. A última convocatoria realizouse en novembro de 2021.

O certificado galego de competencias dixitais en ofimática (CODIX) segue sendo válido ata que se aproben os criterios de homologación entre a certificación CODIX e a nova acreditación ComDix -tal como sinala o Decreto 123/2021 na súa disposición transitoria única-.

Devanditos criterios serán aprobados e publicados mediante unha orde que regulará todos os aspectos sobre a convalidación, a homologación e o recoñecemento entre a anterior certificación CODIX e a nova certificación ComDix, así como o procedemento para a súa obtención. Ata ese momento, o CODIX segue tendo validez.